Футболдан жастар арасында 2027 жылы өтетін Еуропа чемпионатына іріктеу аясында Қазақстан Андорраны қабылдап, 1:0 есебімен жеңіске жетті, деп хабарлайды 24kz.
Жалғыз голдың авторы – Олжас Байбек. Осылайша, EURO-2027 турниріне іріктеу кезеңінде алғашқы 3 ұпайын еншіледі. Ал матчтағы үзіліс кезінде 300-ге жуық еріктілер «Таза Қазақстан» акциясы аясында ерекше флешмоб ұйымдастырып, қоғамды қоршаған ортаны қорғауға шақырды.
Футбол ойынынан кейін волонтёрлер стадионды қоқыстан тазартты
Ал қос құрама арасындағы кездесуден кейін бір топ еріктілер матч өткен стадионды қоқыстан тазартты. Бұндай игі бастама арқылы жастар «Таза Қазақстан» экологиялық акциясына қолдау танытты. Бұл бастама ел тұрғындарын табиғатты қорғауға, қоғамдық орындарда тазалық сақтауға шақырады. Волонтёрлер жанкүйерлерден қалған қоқысты, тамақ қалдықтарын жинап, арнайы контейнерлерге бөліп салды. Жастардың белсенділігі өскелең ұрпаққа экологиялық тәрбие берудің маңызды құралына айналып отыр. «Мұндай игі істер азаматтық жауапкершілікті арттырып, қоршаған ортаға деген көзқарасты өзгертеді», - деді ұйымдастырушылар.
