Рәміздер күні дүниеге келген сәбилерге сыйлық берілді, деп хабарлайды 24KZ. Астанада мұндай мерекелік акцияны Мәдениет және ақпарат министрлігі мен Геральдика орталығы ұйымдастырып отыр.
Жаңа туған сәбилердің біріне әнші Димаш Құдайбергеннің құрметіне орай Дінмұхамед есімі қойылған. Бұл отбасыны әйгілі өнерпаздың анасы, Қазақстанның еңбек сіңірген қайраткері Светлана Айтбаева арнайы құттықтады. Барлық сәби мен олардың аналарына министр Аида Балаеваның атынан алғысхат пен сыйлықтар табыс етілді. Қалалық №3 перзентханада түске дейін 26 нәресте дүниеге келді.
Гаухар Жарасбаева, қала тұрғыны:
- Бұл үшінші балам болады. Үйде 2 ханшайымым бар. Димаш ағасы сияқты Қазақстанға, әлемге танымал болсын, жұлдыз болсын деген ниетте атын Дінмұхамед деп қояйық деп шештік. Құттықтап, бізге сыйлықтарын беріп жатқанына, тілек айтып жатқанына қуанамын.
