Астанада қараша айының 25-29 күндері ауылдық мектептердің 9-11 сынып оқушыларына арналған жалпы білім беретін пәндер бойынша Республикалық олимпиада өтті, деп хабарлайды Egemen.kz.
Осы білім додасында Ұлытау облысы, Жаңаарқа ауданының тоғыз оқушысы жаратылыстану-математикалық бағытта жүлделі орындарды иеленді.
10-сынып оқушысы Көркем Кейкова математика пәнінен үздік білім көрсетіп, І орын — алтын медальға ие болды. Жетекшісі Гүлсім Рахымжанова.
Химия пәнінен 10-сынып оқушысы Жәнібек Абюров ІІІ орын – қола медальды олжалады. Жетекшісі Шайзада Искакова.
Математика пәнінен 9-сынып оқушысы Нәрік Медина ІІІ орын алып, қола жүлдеге ие болды. Жетекшісі Самат Ізтөлеуов.
10-сынып оқушысы Мирас Қарағызов математика пәнінен және 10-сынып оқушысы Бексұлтан Қаржаубай физика пәнінен грамоталармен мадақталды.
Республикалық деңгейде топ жарған оқушыларды және олардың ұстаздарын Жаңаарқа ауданының әкімі Қанат Қожықаев салтанатты түрде қабылдады.
«Сіздер тек өңіріміздің емес, елдің де үмітін ақтап отырсыздар. Білімге деген ықыластарыңыз – болашақтың кепілі. Ізденісті тоқтатпай, алға жылжи беріңіздер. Біз әрдайым қолдаймыз», деп ізгі тілегін жеткізді аудан әкімі.
Кездесу барысында аудан басшысы олимпиада жеңімпаздарын құттықтап қоймай, жүлделі орын алған оқушыларға смартфон, мадақтамамен марапатталған оқушыларға планшет табыстады. Сонымен қатар жетекші ұстаздар аудан әкімінің алғыс хатымен марапатталды.
Ұлытау облысы
