Көкшетауда қайтарылған активтер қаражаты есебінен жаңа спорт кешені салынып жатыр. Үкімет жобаға Арнаулы мемлекеттік қордан 12,6 млрд теңге бөлді. Ғимаратта олимпиадалық стандарттың сертификатталған құралдарымен жабдықталған бокс, күрес, ауыр атлетика және кроссфитке арналған залдар бар.
Бұл қалада республикалық және әлемдік деңгейдегі жарыстарды өткізуге мүмкіндік береді. Нысан аумағында екі футбол және ядро мен найза лақтыруға арналған алаңдар, ойын мен жаттығу аймақтары, әмбебап спорт пен жеңіл атлетика аймағы салынады. Оған қоса инклюзивті құрал-жабдықтар қарастырылған. Өрт-қолданбалы спорт түрлеріне арналған скалодром мен мұнарасы бар әмбебап спорт зал ашылады. Мұнда кәсіби құтқарушыларды даярлайтын Азаматтық қорғау академиясының курсанттары кәсіби дағдыларын жетілдіреді.
Мәдени-бұқаралық іс-шараларға арналған заманауи мультимедиялық жүйелері бар 650 орындық зал қолжетімді болады. Бүгінде кешенде негізгі құрылыс жұмыстары аяқталды. Қазір ішкі әрлеу, абаттандыру жұмыстары мен инженерлік желілер жүргізіліп жатыр. Нысан жыл соңына дейін қолданысқа беріледі.
