Бұл күнді халқымыздың дербес ел болуына жол ашқан қастерлі күн деуге болады. Бүгін Республика күніне арналған салтанатты жиында сөз сөйлеген Президент осылай деді. Мемлекет басшысы қастерлі мейрамды еліміздің ең басты мерекесі екенін атап өтті. Осы игі дәстүрге сай бүгін Ақордада елдің ең үздік азаматтарын жинап еңбегі еленгендерге жоғары марапаттарды табыстады.
Өз сөзінде Президент бұл күнді ұлтымыздың еркіндікке ұмтылған рухының символы екенін айтты. «Тәуелсіздік — ең қымбат байлығымыз. Оны сақтау мен нығайту — бәріміздің ортақ парызымыз. Ал егемендік – ата-бабаларымыздың ұлт мүддесі жолындағы өшпес ерлігінің айқын көрінісі», – деді Мемлекет басшысы. Сонымен қатар Президент болашаққа зор сеніммен қарайтынымызды жеткізді. Егемендік жылдары еліміз талай жетістікке жетті. Бүгінде Қазақстанның дамуын бүкіл әлем мойындап отыр.
Қасым-Жомарт Тоқаев, Қазақстан Республикасының Президенті:
- Бүгінде жаһан жұрты еліміздің өсіп-өркендеп келе жатқанына куә болып, өз құрметін көрсетуде. Алайда кемшіліксіз, мінсіз жұмыс болмайтыны анық. Біз өткеннен сабақ алып, ешкімге жалтақтамай, өз жолымызбен жүріп келеміз. Соңғы жылдары халықтың әл-ауқатын арттыру үшін аса маңызды қадамдар жасалды. 2019 жылы ауқымды реформалар қолға алынды. Қазақстан жаңа тұрпатты ел болу жолына түсті.
