Қытайдың Чэнду қаласында XX Батыс Қытай халықаралық жәрмеңкесі өтіп жатыр, деп хабарлайды 24kz.
Оған түрлі елден 3 мыңнан аса компания жиналды. Құрметті меймандар қатарында Қазақстан да бар. Іс-шара 2000-жылдардан бері өтіп келеді. Қазір жәрмеңке жаһандық серіктестік орнататын маңызды алаңға айналып, бір триллион доллардан аса келісімдерге қол қойылған.
Қазақстан үшін жәрмеңке – отандық экспортты жандандырып әрі инвестиция тартып, Қытайдың батыс провинцияларымен байланысты нығайту үшін тамаша мүмкіндік. Елдің павильоны 110 шаршы метр аумақты алып жатыр. Келушілер Қазақстанның экономикалық, экспорттық және инвестициялық әлеуетімен таныса алады. 29 мамырға дейін жалғасатын халықаралық іс-шарада біздің делегацияны Сауда және интеграция министрі Арман Шаққалиев бастап барды.
Арман Шаққалиев, ҚР Сауда және интеграция министрі:
- Қытайдан Еуропаға құрлық арқылы жөнелтілетін жүктің 80%-і Қазақстан аумағы арқылы өтеді. Чэнду қаласы орналасқан Сычуань провинциясының географиялық жағынан стратегиялық маңызы зор. Бұл өңір Қытайдың бесінші экономикасы саналады. Былтыр біз осы Сычуаньға экспорт көлемін 30%-ке арттырдық. Осы іс-шараға қатысу – Қытайдың батыс провинцияларындағы серіктестер мен қатысушы елдерге еліміздің сауда-экономикалық әлеуеті мен инвестициялық тартымдылығын көрсетуге мүмкіндік.
Қытай – Қазақстанның ірі сауда серіктестерінің бірі. Былтыр арадағы алыс-беріс көлемі 44 миллиард долларға жеткен. Бізде өндірілетін уранның 20%-і шығыстағы көршімізге жеткізіледі. Атасу – Алашанькоу құбыры арқылы жыл сайын Қытайға 15 миллион тонна мұнай, ал «Орталық Азия – Қытай» құбыры арқылы 10 миллиард текше метр газ тасымалданады. Қазақстанның көрші мемлекет үшін логистикалық маңызы да зор. Былтыр арадағы тасымал көлемі 12 миллион тоннадан асқан.
