Мемлекеттік білім беру гранттарының иегерлері анықталды. Биыл конкурсқа 113 мыңдай өтініш түскен, деп хабарлайды 24kz.

Былтырғымен салыстырғанда 9 мыңға артық. Бакалаврға 78 мың, ал магистратура мен докторантураға 93 мыңнан аса грант бөлінді. Дарынды балаларға да, әлеуметтік топтағы мен әскерилерге де жеңілдіктер қарастырылып, қамсыз білім алуына жағдай жасалды.

Сағым қумай, сабақ оқығандардың жолы болды. Берілмей, бір белесті аттап, білім грантын алды. Жұмысшы мамандықтар жылында гранттың 60%-і инженерлік және техникалық бағытқа бұйырды. Ел экономикасының еңсесін тіктейтін кадрлар әманда керек.

Сосын жоғары сұраныста педагогика, ақпараттық технологиялар мен жасанды интеллект тұр. Бұлар сірә, заман зауқына қарай қажет. Өңірлер де өзінде сирек кәсіп иелеріне квота бөлген. Ветеринария, энергетика, су шаруашылығы, ирригация, тағы гидротехнология бар.

Саясат Нұрбек, ҚР Ғылым және жоғары білім министрі:

- Осы жылдың тағы бір ерекшелігі – Қорғаныс министрлігімен бірге жасаған жұмысымыздың аясында биыл тұңғыш рет әскери борышын өтеп келген азаматтар 2 мыңға жуық грантқа ие болды. Сондықтан әскери борышын өтеуге ынталандыру бағытында арнайы осындай квота енгізілді. Ата-анасыз жетім қалған балаларға, әлеуметтік аз қамтылған отбасылардан шыққан балаларға да арнайы квота бөліп, қолдайтын болдық.

«Серпін» бағдарламасында да серпіліс бар. Алғаш рет тарихи рекорд орнады. Биыл грант 83%-ке игерілген. Ал, 4 жыл бұрын тең жартысы текке қалатын. Талапкерлер солтүстік, шығыс және орталық өңірлерге барады, тегін білім алады. Айтпақшы, «Amanat» партиясы да сайлауалды уәдесіне сәйкес 77 мыңнан аса грант бөлген. Мұның сыртында халықаралық олимпиадалар мен спорттық жарыс жеңімпаздарына мемлекет қолдау бар. Әлеуметтік санаттағы балалар да саптан шықпайды. Оларға өз алдына квота сақталған. Еліміз өңірлік білім хабы ретінде де қалыптасып жатыр. Шетелдік жетекші университеттердің серіктестік 20-ға жуық жоғары оқу орны студенттер қабылдай бастады.

Айдос Жұманазаров, педагог-профориентолог, білім сарапшысы:

- Ми үшін талас дейді. Білімді адамдар шетелге кетпей, елде қалады. Қаржы мәселесі бар. Өз нарығымызда қалады.

Қамсыз білім үшін тегін оқу, шәкіртақы қажет-ақ. Бірақ мәселе бүгінгі берілген грантта емес, ертеңгі күні алатын еңбекақының мардымды болуында. Сарапшылар: «Мамандықтың мәртебесі көтерілсе өзге түйткілдің түйіні шешіледі», — дейді. Мысалы, мұғалімдерге оң бетбұрыс, педагогика саласын олжалы етті.

Авторы: Нысаналы Ығыл